Abantu icumi bapfuye nyuma y’aho kajugujugu ebyiri z’igisirikare cya Maleziya (Malaisie/Malaysia) kirwanira mu kirere zigonganiye mu kirere ziri mu myitozo y’akarasisi.
Imwe muri izi kajugujugu yaciye inkingi y’amababa (rotor) y’iyindi mbere y’uko zombi zisukira ku butaka, nk’uko biboneka mu mashusho yasohowe n’ibinyamakuru byo muri iki gihugu.
Igisirikare cya Maleziya kirwanira mu kirere cyagize kiti: “Abari muri izi ndege bose bapfuye, ibisigazwa bikaba byajyanwe ku bitaro bya gisirikare [bya Lumut] ku mpamvu zo kumenya umwidondoro wabo”.
Kivuga kandi ko kigiye gushinga komite yo gukora iperereza ku cyateye iyi mpanuka.
Bivugwa ko imwe muzi izi kajugujugu, izwi nka HOM M503-3 yarimo abantu barindwi, yaguye mu muhanda.
Iyindi izwi nka Fennec M502-6 yarimo abandi batatu, yaguye muri pisine (piscine) hafi y’aho.
Ikigo cy’igihugu gishinzwe ubutabazi no kuzimya imiriro kivuga ko cyamenyeshejwe iyi mpanuka saa tatu n’iminota 50 z’igitondo (9h50) mu masaha yo muri icyo gihugu (ni ukuvuga saa cyenda z’ijoro n’iminota 50 mu masaha ya Kigali).
