Nyuma y’imikino 24 imaze gukinwa, APR FC yiyongereye icyizere cyo kwegukana Shampiyona nyuma yo gushyiramo amanota 13 hagati yayo na Rayon Sports ya kabiri ndetse na 14 hagati yayo na Musanze FC ya gatatu.
Ikipe y’Ingabo z’Igihugu ntiratsindwa muri iyo mikino yose ndetse ishobora kuba ikipe ya mbere itwaye Shampiyona hakiri kare mu gihe yatwara igikombe ku Munsi wa 25, mu gihe mu 2017, Rayon Sports yagitwaye nyuma y’imikino 26 gusa.
Nubwo iyi Kipe yambara Umukara n’Umweru yatsinze imikino 17, ikanganya irindwi gusa, abakunzi bayo ntibanyuzwe n’imikinire yayo, ubwitabire ku kibuga buracyendera kugeza ubwo Umutoza Thierry Froger yemera guca bugufi, akabatangariza ko akinisha abakinnyi bose bifuza kugira ngo bitabire umukino wa Rayon Sports ari benshi.
APR FC irasatira kwegukana Shampiyona ku nshuro ya gatanu yikurikiranya ndetse kizaba ari igikombe cya 23 yegukanye kuva ishinzwe mu 1993.
Gusa, igiye gutwara Shampiyona itemeje abakunzi bayo…
Ubwo umwaka w’imikino watangiraga, APR FC ikina CAF Champions League, abakunzi bayo bari bayifitiye amatsiko nyuma yo gusubira kuri politiki yo gukinisha abanyamahanga yaherukaga mu 2012.
Gusa, ntibyamaze kabiri kuko abafana batangiye kugabanuka ku kibuga nyuma yo gutsindwa na Rayon Sports ibitego 3-0 kuri FERWAFA Super Cup no kunyagirwa na Pyramids FC ibitego 6-1 ubwo yari imaze gusezerera bigoranye Gaadidka FC muri Champions League.
Ibi byaturutse ku mikinire idashamaje y’iyi kipe itozwa na Thierr Froger, abafana bamwe bashinje kudatoranya ikipe ye nziza aho akenshi yicazaga abakinnyi barimo Niyigena Clément, Shaiboub Ali na Salomon Banga Bindjeme byarangiye avuye muri iyi kipe.
Ibi bijyana kandi no kuba mu mikinire yayo, APR yaranzwe no gutsinda ibitego bike mu mikino yakinnye dore ko mu ntsinzi 17 ifite muri Shampiyona y’uyu mwaka, aho yarengeje igitego 1-0 cyangwa igatsinda harimo ikinyuranyo kirenze igitego kimwe ari kuri Etincelles FC (3-0), Gorilla FC (4-1), Amagaju FC (3-1), Marines FC (5-2), Musanze FC (3-1), Mukura (2-0) na Rayon Sports (2-0).
Ku mikino myinshi, APR FC yabonaga intsinzi zigoranye aho yarushwaga cyane mu gice cya kabiri, iminota 90 ikarangira amagambo yashize ivuga ku bakunzi bayo.
Ibi bijyana no kuba iyi kipe yaragize umusaruro mubi mu yandi marushanwa yose yakinnye arimo Mapinduzi Cup yaviriyemo muri ½, Igikombe cy’Intwari yatsindiwe ku mukino wa nyuma muri iri rushanwa ryari ryahuje amakipe ane ndetse n’Igikombe cy’Amahoro aho yasezerewe na Gasogi United muri ¼.
Ni iki gikwiye guhinduka muri iyi Kipe y’Ingabo?
Ni byiza ko APR FC isa n’iyamenye kare ko izatwara Igikombe cya Shampiyona ndetse akaba ari yo izahagararira u Rwanda muri CAF Champions League ya 2024/25, aho igomba kwitegura neza kare.
Imyiteguro y’uyu mwaka w’imikino w’imikino wa 2023/24 uri kugana ku musozo ntiyagenze neza, ahanini bigendanye n’impinduka 100% zabaye muri iyi Kipe y’Ingabo uhereye kuri politiki yo gukinisha abanyamahanga, abatoza bashya n’ubuyobozi bushya bukuriwe na Col Richard Karasira.
Gutinda kubona umutoza, Thierry Froger akagera muri APR FC habura ibyumweru bitatu gusa ngo umwaka w’imikino utangire, byagoye intangiriro nshya muri iyi kipe yambara umukara n’umweru.
Froger ntiyishimiwe n’abakunzi ba APR FC ndetse nubwo ataratsindwa muri Shampiyona, n’ubuyobozi ntibwanyuzwe n’umusaruro we, ariko nta yandi mahitamo bwari bufite ku hazaza he uretse gutegereza ko asoza uyu mwaka w’imikino kuko butari kumwirukana bugihanganye n’uwahoze ari Umutoza w’iyi Kipe, Erradi Adil Mohammed, wajuririye kumwirukana binyuranyije n’amategeko mu 2022.
Gusanga ubuyobozi bwariguriye abakinnyi na byo byabaye ihurizo ku mutoza Froger wagaragaje ko atanyuzwe n’imigurire ndetse abishimangira yicaza benshi mu bakinnyi bashya, abandi abahindurira imyanya kugeza ubwo Niyomugabo Claude wakinaga inyuma ku ruhande rw’ibumoso, kuri ubu yabaye umukinnyi wubakirwaho umukino mu busatirizi, agakina ahazwi nko kuri nimero 10.
Ikindi cyazonze iyi Kipe y’Ingabo ni ukwifata nk’aho itazi icyo ishaka mu marushanwa aho yongeye gukora amakosa yamenyereye yo kwitegura amarushanwa Nyafurika ku makipe y’imbere mu gihugu nka Marines FC, Mukura VS n’ayandi, ubundi yakabaye yiyongeraho andi ari mpuzamahanga.
Hari icyizere ko iki gishobora guhinduka kuko nyuma ya CECAFA 2019, APR FC yitabiriye Mapinduzi Cup muri Mutarama, riba irushanwa rya mbere mpuzamahanga riri mu rwego rw’imikino ya gicuti [hatarimo amarushanwa ya CAF] yakinnye kuva ihuye na KCCA mu mukino wa gicuti wabaye mu mpeshyi ya 2017.
Mu gihe habura amezi atanu ngo umwaka mushya w’imikino wa 2024/25, APR FC yakabaye itangira gutekereza ku mutoza izakorana na we, yakongera kuba Froger akagirirwa icyizere cyo kwirambagiriza abakinnyi ndetse na bo bagashakwa ari abo guhangana n’amakipe y’ibigugu muri Afurika kuko ibyo mu Rwanda byoroshye, amakipe bahatana na yo ari za Bugesera FC, Kiyovu Sports na Etincelles FC zishobora kugeza ku mezi atanu zitarahemba.
Bijyanye n’uko APR FC imaze iminsi yitwara nabi muri CAF Champions League, mu mwaka w’imikino utaha, izongera gutombora ikipe yoroshye ziri ku rwego rumwe, cyangwa ihure n’imwe mu zikomeye gato kurushaho ariko mu ijonjora rya kabiri hari ikigugu kitakinnye iribanza.
